ସରୋଜ ଭାଇଙ୍କ ଆଦର୍ଶରେ ଗଢ଼ାଗଲା 'ଜନ ସେବା ସଂଗଠନ'

ରାହାମା, 11/11/2025, ଉତ୍କଳ voice news - utkalvoicenews.com( ତିର୍ତୋଲ ରୁ ଜଗନ୍ନାଥ ପ୍ରସାଦ ସାହୁ ଙ୍କ ରିପୋର୍ଟ ) : ଜଗତସିଂହପୁର ଜିଲ୍ଲା କୁଜଙ୍ଗ ବ୍ଳକ ସାଇଲୋ ପଞ୍ଚାୟତର ​ମଠସାହିଠାରେ ନିଃସ୍ୱାର୍ଥପର ଜନସେବାରେ ନିଜ ଜୀବନ ଉତ୍ସର୍ଗ କରିଥିବା ସ୍ୱର୍ଗତ ସରୋଜ ଭାଇଙ୍କ ପାଇଁ ରବିବାର ଦିନ ତାଙ୍କ ବାସଭବନରେ ଏକ ହୃଦୟବିଦାରକ କିନ୍ତୁ ପ୍ରେରଣାଦାୟକ ଶ୍ରଦ୍ଧାଞ୍ଜଳି ସଭା ଆୟୋଜିତ ହୋଇଯାଇଛି। ସମସ୍ତେ ଆଖିରୁ ଲୁହ ପୋଛି 'ସରୋଜ ଭାଇ ଜନ ସେବା ସଂଗଠନ' ଗଠନ କରିବା ସହ ତାଙ୍କ କର୍ମପଥକୁ ଆଗକୁ ନେବାକୁ ଶପଥ ନେଇଛନ୍ତି। ସଭାର ଶୁଭାରମ୍ଭରେ ମୁଖ୍ୟ ଅତିଥି ଓ ସମ୍ମାନିତ ବ୍ୟକ୍ତିମାନେ ପ୍ରଦୀପ ପ୍ରଜ୍ୱଳନ କରିଥିଲେ। ପରେ ତାଙ୍କ ପବିତ୍ର ଆତ୍ମାକୁ ସମ୍ମାନ ଜଣାଇ ସମସ୍ତେ ୨ ମିନିଟ୍ ନିରବ ପ୍ରାର୍ଥନା କରିଥିଲେ। ଏହି ନିରବତା ସମୟରେ ପ୍ରତ୍ୟେକ ବନ୍ଧୁଙ୍କ ହୃଦୟରେ ସରୋଜ ଭାଇଙ୍କ ସ୍ନେହଭରା ସ୍ମୃତି ଭରି ରହିଥିଲା।ସଭାର ମୁଖ୍ୟ ଉଦ୍ଦେଶ୍ୟ ଥିଲା, ଲୁହ ନୁହେଁ କର୍ମ ମାଧ୍ୟମରେ ସରୋଜ ଭାଇଙ୍କୁ ପ୍ରକୃତ ଶ୍ରଦ୍ଧାଞ୍ଜଳି ଦେବା। ତେଣୁ ତାଙ୍କ ଦ୍ୱାରା ଅଧୁରା ଥିବା ସମାଜସେବାକୁ ଆଗକୁ ବଢ଼ାଇବା ପାଇଁ 'ସରୋଜ ଭାଇ ଜନ ସେବା ସଂଗଠନ' ନାମରେ ଏକ ସଂଘ ଗଠନ ପାଇଁ ସର୍ବସମ୍ମତି କ୍ରମେ ନିଷ୍ପତ୍ତି ନିଆଗଲା। ପରେ 'ସ୍ମୃତିର ସ୍ୱର - କିଛି କଥା, କିଛି କବିତା' କାର୍ଯ୍ୟକ୍ରମରେ ବହୁ ବନ୍ଧୁ ତାଙ୍କ ସହ ଥିବା ଗଭୀର ସମ୍ପର୍କର କଥା ବାଣ୍ଟିବା ସହ କବିତା ମାଧ୍ୟମରେ ନିଜ ଭାବନା ପ୍ରକାଶ କରିଥିଲେ। ଅନେକ ବନ୍ଧୁ ଭାବବିହ୍ୱଳ ହୋଇ ନିଜ ଆଖିରୁ ଲୁହ ଝରାଇଥିଲେ। କାର୍ଯ୍ୟକ୍ରମ ଶେଷରେ ସମସ୍ତେ ଏକତ୍ର ସାମୁହିକ ଭାବେ ଶପଥ ଗ୍ରହଣ କରିଥିଲେ ଯେ ସରୋଜ ଭାଇଙ୍କ ସେବାପଥରେ ସେମାନେ ନିଜ ଜୀବନକୁ ଉତ୍ସର୍ଗ କରିବେ। ସଭାରେ ମୁଖ୍ୟ ଅତିଥି ଶ୍ରୀ ଦିଲୀପ କୁମାର ସ୍ୱାଇଁଙ୍କ ସହ ସମ୍ମାନିତ ଅତିଥି ଶ୍ରୀ ଅନ୍ତର୍ଯ୍ୟାମି ଦାସ, ଶ୍ରୀ କିଶୋର ସ୍ୱାଇଁ, ଶ୍ରୀ ନିରଞ୍ଜନ ସୁତାର, ଶ୍ରୀ ସୁରେଶ ଚନ୍ଦ୍ର ବାରିକ, ଶ୍ରୀ ପବିତ୍ର ମୋହନ ମନ୍ତ୍ରୀ ଏବଂ ଶ୍ରୀ ସନ୍ତୋଷ ବେହେରା ପ୍ରମୁଖ ଉପସ୍ଥିତ ଥିଲେ। ଶ୍ରୀ ପ୍ରକାଶ ଚନ୍ଦ୍ର ସ୍ୱାଇଁ ମଞ୍ଚ ପରିଚାଳନା କରିଥିଲେ ଏବଂ ଶ୍ରୀ ବିବେକ ଦାସଙ୍କ ସମେତ ଅନ୍ୟ ସହଯୋଗୀମାନେ କାର୍ଯ୍ୟକ୍ରମକୁ ସଫଳ କରିଥିଲେ। ଶେଷରେ ଅଂଶଗ୍ରହଣକାରୀ ବନ୍ଧୁମାନଙ୍କୁ ପ୍ରମାଣପତ୍ର ପ୍ରଦାନ କରାଯାଇଥିଲା।