ଅଧୁରା ସ୍ୱପ୍ନକୁ ପୂରଣ କରିବ 'ସରୋଜ ଭାଇ ଜନସେବା ସଂଗଠନ

କୁଜଙ୍ଗ (ରାହାମା), 29/12/2025, ଉତ୍କଳ voice news - utkalvoicenews.comସାଇଲୋରେ ଆୟୋଜିତ ହେବ ମାଗଣା ଚକ୍ଷୁ ଓ କର୍କଟ ଚିକିତ୍ସା ଶିବିର ( ରିପୋର୍ଟ---ରାହାମା ରୁ ଜଗନ୍ନାଥ ପ୍ରସାଦ ସାହୁ ) : ମଣିଷ ଚାଲିଯାଏ ସତ, କିନ୍ତୁ ତାର କର୍ମ ଆଉ ସେବା ସବୁଦିନ ପାଇଁ ଅମର ହୋଇ ରହିଯାଏ। ସାଇଲୋ ପଞ୍ଚାୟତର ପ୍ରିୟ ତଥା ଦିବଂଗତ ସରପଞ୍ଚ ସ୍ୱର୍ଗତ ସରୋଜ କୁମାର ସେଠି (ସରୋଜ ଭାଇ) ଆଜି ଆମ ଗହଣରେ ନାହାନ୍ତି, କିନ୍ତୁ ତାଙ୍କର ଜନସେବା କରିବାର ସେହି ଅଦମ୍ୟ ଇଚ୍ଛାଶକ୍ତିକୁ ଜୀବିତ ରଖିବା ପାଇଁ ଅଣ୍ଟା ଭିଡ଼ିଛି "ସରୋଜ ଭାଇ ଜନସେବା ସଂଗଠନ"। ସରୋଜ ଭାଇଙ୍କ ସ୍ମୃତିରେ ଆସନ୍ତା ଜାନୁଆରୀ ୪ ତାରିଖ, ରବିବାର ଦିନ ସାଇଲୋ ପଞ୍ଚାୟତ କାର୍ଯ୍ୟାଳୟ ପରିସରରେ ଏକ ମହତ୍ 'ମାଗଣା ଚକ୍ଷୁ ଓ କର୍କଟ ଚିକିତ୍ସା ଶିବିର' ଆୟୋଜନ କରାଯାଉଛି। ଏହି ପରିପ୍ରେକ୍ଷୀରେ ରବିବାର ଦିନ ସରୋଜ ଭାଇଙ୍କ ଅଧୁରା ସ୍ୱପ୍ନକୁ ସାକାର କରିବା ପାଇଁ ଏକ ଭାବପୂର୍ଣ୍ଣ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି।ଏହି ସ୍ୱାସ୍ଥ୍ୟ ଶିବିରରେ କଟକ ଓ ଭୁବନେଶ୍ୱରରୁ ଆସିଥିବା ବିଶେଷଜ୍ଞ ଡାକ୍ତରମାନେ ଯୋଗ ଦେଇ ଅଞ୍ଚଳବାସୀଙ୍କୁ ମାଗଣାରେ ଚକ୍ଷୁ ପରୀକ୍ଷା ଓ କର୍କଟ ଭଳି ମାରାତ୍ମକ ରୋଗ ବିଷୟରେ ସଚେତନ କରାଇବେ। ସରୋଜ ଭାଇ ସବୁବେଳେ ଚାହୁଁଥିଲେ ସାଇଲୋ ଏବଂ ଆଖପାଖ ଅଞ୍ଚଳର ଗରିବ ଓ ଅସହାୟ ଲୋକମାନେ ଯେପରି ସ୍ୱାସ୍ଥ୍ୟ ସେବାରୁ ବଞ୍ଚିତ ନ ହୁଅନ୍ତି। ତାଙ୍କର ସେହି ସ୍ୱପ୍ନକୁ ସମ୍ମାନ ଜଣାଇ ସାଇଲୋ ସମେତ ହଂସୁରା, ବଡବାଲିକଣି, ପଣ୍ଡୁଆ, ଗରେଇ, ପୋତାନାଇ, ତାଳପଡା ଓ ପଙ୍କପାଳ ପଞ୍ଚାୟତର ଜନସାଧାରଣଙ୍କୁ ଏହି ଶିବିରରେ ଯୋଗ ଦେବା ପାଇଁ ସଂଗଠନ ପକ୍ଷରୁ ଗଭୀର ନିବେଦନ କରାଯାଇଛି।ଆଜିର ଏହି ଆବେଗଭରା ବୈଠକରେ ସରୋଜ ଭାଇ ଜନସେବା ସଂଗଠନର ସଭାପତି ବିବେକ ଦାସ, ସାଇଲୋ ପଞ୍ଚାୟତର ନାଏବ ସରପଞ୍ଚ ଶ୍ରୀମତୀ ଝରଣା ଦାସ, ୱାର୍ଡ ମେମ୍ବର କଳ୍ପନା ସେଠି, ବୈଶାଖୀ ଦାସ, ମହେଶ୍ୱର ଦାସ, ସଂଗଠନ ସମ୍ପାଦକ ଦେବାଶିଷ ପାତ୍ର, ଉପସଭାପତି ଜ୍ଞାନ ରଞ୍ଜନ ବାରିକ, ଗୋପାଳ ଦାସ, ସୁଧାଂଶୁ ଶେଖର ସାମଲ ଏବଂ ବିଜୟ ଷଡ଼ଙ୍ଗୀଙ୍କ ସମେତ ବହୁ କର୍ମକର୍ତ୍ତା ଉପସ୍ଥିତ ଥିଲେ। ସମସ୍ତ କର୍ମକର୍ତ୍ତାଙ୍କ ଆଖିରେ ସରୋଜ ଭାଇଙ୍କୁ ହରାଇବାର ଦୁଃଖ ଥିଲେ ମଧ୍ୟ, ତାଙ୍କ ଦର୍ଶାଯାଇଥିବା ସେବା ମାର୍ଗରେ ଚାଲିବାର ଏକ ଦୃଢ଼ ସଂକଳ୍ପ ଦେଖିବାକୁ ମିଳିଥିଲା.ଜାନୁଆରୀ ୪ ତାରିଖରେ ହେବାକୁ ଥିବା ଏହି ମାଗଣା ସେବା ଶିବିରରେ ଅଧିକରୁ ଅଧିକ ଲୋକ ପହଞ୍ଚି ସୁବିଧା ଗ୍ରହଣ କରିବା ହିଁ ସ୍ୱର୍ଗତ ସରୋଜ ଭାଇଙ୍କ ପ୍ରତି ପ୍ରକୃତ ଶ୍ରଦ୍ଧାଞ୍ଜଳି ହେବ ବୋଲି ସଂଗଠନ ପକ୍ଷରୁ ଗଣମାଧ୍ୟମ ଜରିଆରେ କୁହାଯାଇଛି।