ଅଙ୍ଗନୱାଡ଼ି କେନ୍ଦ୍ର ସ୍ଥାନାନ୍ତର ଘଟଣାରେ ସାହିବାସିନ୍ଦା ଙ୍କ ସିଡିପିଓ କାର୍ଯ୍ୟାଳୟ ସମ୍ମୁଖରେ ଧାରଣା ।

ଗଂଜାମ / ହିଞ୍ଜିଳିକାଟୁ, 28/05/2026, ଉତ୍କଳ voice news - utkalvoicenews.com(୨୭/୫) : ହିଞ୍ଜିଳିକାଟୁ ପୌରାଞ୍ଚଳସ୍ଥିତ ୱାର୍ଡ ନଂ ୧୦ ରେଗିଡ଼ି ଚାରିଛକରେ ଥିବା ଅଙ୍ଗନବାଡ଼ି କେନ୍ଦ୍ର ମୁଖ୍ୟ ବଜାର ନିକଟ ତଳ ରେଗିଡ଼ିକୁ ସ୍ଥାନାନ୍ତର ଘଟଣାକୁ ନେଇ ଆଜି ସାହିବାସିନ୍ଦା ମାନେ ସକାଳ ୭ ଘଟିକା ସମୟରେ ହିଞ୍ଜିଳିକାଟୁ ସିଡିପିଓ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ | ଧାରଣା ଦେବାର ୩ ଘଣ୍ଟା ପରେ ସିଡିପିଓ ଶ୍ରୀମତି ବିଜୟଲକ୍ଷ୍ମୀ ପାଢ଼ୀ କାର୍ଯ୍ୟଳୟ କୁ ଆସିଥିଲେ ଯାହାକୁ ନେଇ ସ୍ଥାନୀୟ ସାହିବାସିନ୍ଦାଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା । ପ୍ରଚଣ୍ଡ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ରାଜ୍ୟ ସରକାର ସମସ୍ତ ସରକାରୀ କାର୍ଯ୍ୟାଳୟ ସକାଳୁଆ ଘୋଷଣା କରିଥିବା ବେଳେ ପ୍ରଶାସନିକ ଅଧିକାରୀଙ୍କ ଏଭଳି ମନ ମାନି କାର୍ଯ୍ୟକୁ ସାହିବାସିନ୍ଦା ମାନେ ନିନ୍ଦା କରିବା ସହ କାର୍ଯ୍ୟରତ ସିଡିପିଓ ଅଧିକାରୀଙ୍କୁ କାର୍ଯ୍ୟାଳୟକୁ ବିଳମ୍ବରେ ଆସିବାକୁ ନେଇ ପ୍ରଶ୍ନ କରିଥିଲେ । ଅନ୍ୟପକ୍ଷରେ ସିଡିପିଓ ବାହାରକୁ କୌଣସି କାର୍ଯ୍ୟର ତଦାରଖ କରିବାପାଇଁ ଯାଇଥିବା କହିଥିଲେ । ତେବେ ପରିସ୍ଥିତି ଏଭଳି ଉତ୍ତେଜନା ପୂର୍ଣ୍ଣ ରହିଥିଲା ଧାରଣା ସ୍ଥଳରେ ହିଞ୍ଜିଳିକାଟୁ ଗୋଷ୍ଠୀ ଉନୟନ ଅଧିକାରୀ ସୁଶ୍ରୀ ସାଗରିକା ଷଡ଼ଙ୍ଗୀ ଏବଂ ତହସିଲଦାର ତପନ କୁମାର ମହାପାତ୍ର ପହଞ୍ଚି ସମସ୍ତଙ୍କୁ ବୁଝାସୁଝା କରିଥିଲେ । ସ୍ଥାନୀୟ ପୌରାଞ୍ଚଳସ୍ଥିତ ୱାର୍ଡ ନଂ ୧୦ ରେଗିଡ଼ି ଚାରିଛକରେ ଥିବା ଅଙ୍ଗନବାଡ଼ି କେନ୍ଦ୍ର ମୁଖ୍ୟ ବଜାର ନିକଟ ତଳ ରେଗିଡ଼ିକୁ ସ୍ଥାନାନ୍ତର ନେଇ ସାହି ବାସିନ୍ଦାଙ୍କ ମନରେ ତୀବ୍ର ଅସନ୍ତୋଷ ଦେଖାଦେଇଥିଲା । ଏହାକୁ ପୂର୍ବରୁ ବିରୋଧ କରି ଆସୁଥିବା ବେଳେ ସାହିବାସିନ୍ଦା ମାନେ ଆଜି ସକାଳୁ ସିଡିପିଓ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ । ହେଲେ ସକାଳ ୧୦ ଟା ସୁଦ୍ଧା ସିଡିପିଓ ଙ୍କ କାର୍ଯ୍ୟାଳୟରେ ଦେଖା ନଥିଲା ଯାହାକୁ ନେଇ କାର୍ଯ୍ୟାଳୟ ସମ୍ମୁଖରେ ତୀବ୍ର ବିରୋଧ ଦେଖାଯାଇଥିଲା । ସୂଚନା ମୁତାବକ ହିଞ୍ଜିଳିକାଟୁ ପୌରାଞ୍ଚଳସ୍ଥିତ ୱାର୍ଡ ନଂ ୧୦ ରେ ୫ ଲକ୍ଷ ଟଙ୍କା ବ୍ୟୟରେ ନିର୍ମିତ ଅଙ୍ଗନବାଡି କେନ୍ଦ୍ର ଜାନୁଆରୀ ୨୬, ୨୦୧୮ ମସିହାରେ ଉଦଘାଟିତ ହୋଇଥିଲା | ଉଦଘାଟନ ପର ଠୁ ୧୦ ନଂ ୱାର୍ଡ ସହ ବର୍ଷ ବର୍ଷ ଧରି ଯଥାକ୍ରମେ ୭ ଓ ୮ ନଂ ୱାର୍ଡର କାର୍ଯ୍ୟ ସମ୍ପାଦନ ହୋଇ ଆସୁଥିଲା | ଗତ ମାସ ୭ ନଂ ୱାର୍ଡ ଅଙ୍ଗନବାଡି କେନ୍ଦ୍ର ନିଜ ୱାର୍ଡରେ ଭଡ଼ା କୋଠା ନିମନ୍ତେ ନିଷ୍ପତ୍ତି ନିଆଯାଇଥିଲା ଏବଂ ପରବର୍ତ୍ତୀ ସମୟରେ ୧୦ ନଂ କେନ୍ଦ୍ରରେ ୮ ନଂ ୱାର୍ଡ କେନ୍ଦ୍ର ମିଳିତ ହୋଇ କାର୍ଯ୍ୟ ସମ୍ପାଦନ ହେଲା | କିନ୍ତୁ ବର୍ତ୍ତମାନ ସେହି ସ୍ଥାନକୁ ନେଇ ଅଯଥା ବିବାଦ ମୁଣ୍ଡ ଟେକିଛି | ଚଳିତ ମାସ ମେ ୧୫ ତାରିଖରେ ୱାର୍ଡ ନଂ ୧୦ର କାଉନସିଲର ପ୍ରତିନିଧିଙ୍କ ସମେତ ୧୫ରୁ ଉର୍ଦ୍ଧ୍ୱ ବୁଦ୍ଧିଜୀବୀ, ଶିକ୍ଷାବିତ୍ ଓ ଅଭିଭାବକ ହିଞ୍ଜିଳି ବିଡ଼ିଓ ସାଗରୀକା ଷଡ଼ଙ୍ଗୀ, ସିଡିପିଓ କାର୍ଯ୍ୟାଳୟ ଓ ଇଓ ସୁକାନ୍ତ ଚନ୍ଦ୍ର ବେଉରାଙ୍କୁ ସାକ୍ଷାତ କରି ଅଙ୍ଗନବାଡି କେନ୍ଦ୍ର ଯେଉଁ ସ୍ଥାନରେ ଅଛି ସେହି ସ୍ଥାନରେ ରହିବାକୁ ଅନୁରୋଧ କରିଥିଲେ |ଚଳିତ ମାସ ୧୮ ତାରିଖରେ କ୍ଷେତ୍ର ପରିଦର୍ଶନରେ ବିଡ଼ିଓ, ଇଓ, ସିଡିପିଓ ଓ ଦୁଇ ଅଙ୍ଗନବାଡି କର୍ମୀଙ୍କ ସମେତ ସାହି ବାସିନ୍ଦା ଉପସ୍ଥିତ ଥିଲେ | ସେହି ଅନୁସାରେ ନିୟମ ତିଆରି ହେଲା - ଏକ ଫର୍ମାଟ ଅନୁଯାୟୀ ପୁରୁଣା ଓ ନୂଆ ବିଲଡିଂ ଦସ୍ତଖତ ଦୁଇ ୱାର୍ଡ ର ଅଙ୍ଗନବାଡି ଦିଦିଙ୍କ ଉପସ୍ଥିତିରେ ୨୫୦ ଘରକୁ ନେଇ ଅଭିଯାନ ହେବ, ଅଧିକ ଦସ୍ତଖତ ଯେଉଁ ବିଲଡିଂ ପାଇଁ ଆସିବ, ସେ ସେଠାରେ ରହିବ ବୋଲି ନିଷ୍ପତ୍ତି ହୋଇଥିଲା | ୨୪୦ ଘର ପୁରୁଣା କୋଠାରେ ରହୁ ଓ ୧୦ ଘର ନୂତନ କୋଠା ବୋଲି ପ୍ରସ୍ତାବ ଆସିଲା କିନ୍ତୁ ପରବର୍ତ୍ତୀ ସମୟରେ ସିଡିପିଓ ଏହା ମିଛ ଦସ୍ତଖତ କହି ଆଗାମୀ ସୋମବାର ଠୁ ସ୍ଥାନାନ୍ତର ନେଇ ଅଙ୍ଗନବାଡି କର୍ମୀଙ୍କୁ ପୋଷଣ ମେଳାରେ ସିଧା ଶୁଣାଇଦେଲେ | ଅନ୍ୟପଟେ ଜାତୀୟ ଶିକ୍ଷା ନୀତି ୨୦୨୦ ଅନୁଯାୟୀ, ପ୍ରାଥମିକ ବିଦ୍ୟାଳୟ ପରିସରରେ ଅଙ୍ଗନବାଡି ରହିବା ଆବଶ୍ୟକ | ଯାହା ଫଳରେ ପିଲା ଶିକ୍ଷା ଲାଭ ପାଇଁ ବାହାରକୁ ଯିବା ଆବଶ୍ୟକ ନାହିଁ, ଏକ ଶୈକ୍ଷିକ ପରିବେଶ ସୃଷ୍ଟି ହେବ।ତଳ ରେଗିଡ଼ି ନିର୍ମାଣ କୋଠା ନିକଟରେ ବିଦ୍ୟୁତ ଟ୍ରାନ୍ସଫର୍ମର ଓ ମୁଖ୍ୟ ବଜାର ରହିଥିବାରୁ ଶିଶୁ ଓ ଗର୍ଭବତୀ ସୁରକ୍ଷିତ ନ ଥିବା ନେଇ ଅଭିଭାବକ ଅଭିଯୋଗ କରିବା ସହ ପିଲାଙ୍କୁ ଛାଡ଼ିବୁନି ବୋଲି କହିଛନ୍ତି |ରେଗିଡ଼ି ପ୍ରାଥମିକ ବିଦ୍ୟାଳୟ ସମ୍ମୁଖରେ ପୁରୁଣା ଅଙ୍ଗନବାଡି କେନ୍ଦ୍ର ଥାଇ ପୁଣି ନୂତନ କେନ୍ଦ୍ର ପାଇଁ କୋଠା ନିର୍ମାଣ କେଉଁ ଉଦ୍ଦେଶ୍ୟରେ କରାଯାଇଥିଲା ଓ ୮ ବର୍ଷର ପୁରୁଣା କୋଠାକୁ ହଠାତ କାହିଁକି ସ୍ଥାନାନ୍ତର କରାଯାଉଛି ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି |ଅନ୍ୟପଟେ ନିଜ ନିଜ ୱାର୍ଡରେ କେନ୍ଦ୍ର ଖୋଲିବାକୁ ଶିକ୍ଷାବିତ ମତ ପ୍ରକାଶ କରିଥିବା ବେଳେ ନୂତନ ଅଙ୍ଗନବାଡ଼ି କୋଠାକୁ ସାହି ପାଠାଗାର ଅବା ଭୋଜିଭାତ ନିମନ୍ତେ କୋଠଘର କରିବାକୁ ସାହି ବାସିନ୍ଦା ପ୍ରଶାସନକୁ ନିବେଦନ କରିଛନ୍ତି |