କୁଜଙ୍ଗରେ ‘ପ୍ରଣାମ ପ୍ରଣବ’ ଶ୍ରଦ୍ଧାଞ୍ଜଳି ଓ ସଙ୍ଗୀତାଞ୍ଜଳି ସଭା

କୁଜଙ୍ଗ, 30/08/2026, ଉତ୍କଳ voice news - utkalvoicenews.com( କୁଜଙ୍ଗ ରୁ ରଶ୍ମିରଞ୍ଜନ ଦାସ ଙ୍କ ରିପୋର୍ଟ। ) : ଜଗତସିଂହପୁର ଜିଲ୍ଲା କୁଜଙ୍ଗ କଳାକାର ସଂଘ ପକ୍ଷରୁ କୁଜଙ୍ଗ ସୂଚନା ଭବନଠାରେ ବିଶିଷ୍ଟ କଣ୍ଠଶିଳ୍ପୀ ସ୍ୱର୍ଗତ ପ୍ରଣବ ପଟ୍ଟନାୟକଙ୍କ ସ୍ମୃତିରେ ‘ପ୍ରଣାମ ପ୍ରଣବ’ ଶ୍ରଦ୍ଧାଞ୍ଜଳି ଓ ସଙ୍ଗୀତାଞ୍ଜଳି ସଭା ଅନୁଷ୍ଠିତ ହୋଇଯାଇଛି। ସଂଘର ସଭାପତି ଜିତେନ୍ଦ୍ରିୟ ରାଉତଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ଉପସଭାପତି ବଳଦେବ ମହାପାତ୍ର ଓ ରୋହିତ ପାତ୍ର, ସମ୍ପାଦକ ପ୍ରଦୀପ ତରାଇ, କୋଷାଧ୍ୟକ୍ଷ ସଞ୍ଜୟ ଓଝା, ମୁଖ୍ୟ ଉପଦେଷ୍ଟା ଜୀବନାନନ୍ଦ ଅଧିକାରୀ, କବି ଗୀତା ଦାସଙ୍କ ସମେତ ବହୁ ସଙ୍ଗୀତପ୍ରେମୀ ଯୋଗଦେଇ ସ୍ୱର୍ଗତ ପ୍ରଣବ ପଟ୍ଟନାୟକଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ବକ୍ତାମାନେ ପ୍ରଣବ ପଟ୍ଟନାୟକଙ୍କ ସଙ୍ଗୀତ ଜୀବନ ଓ ଓଡ଼ିଆ ସଙ୍ଗୀତ ଜଗତକୁ ତାଙ୍କ ଅବଦାନ ସମ୍ପର୍କରେ ଆଲୋଚନା କରିଥିଲେ। ପ୍ରାୟ ୨୦୦ଟି ଓଡ଼ିଆ ଚଳଚ୍ଚିତ୍ରରେ କଣ୍ଠଦାନ କରିବା ସହ ଅନେକ ଭଜନ ଓ ଲୋକପ୍ରିୟ ଗୀତ ଗାଇ ସେ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ତାଙ୍କ ବିୟୋଗ ଓଡ଼ିଆ ସଙ୍ଗୀତ ଜଗତ ପାଇଁ ଅପୂରଣୀୟ କ୍ଷତି ବୋଲି ବକ୍ତାମାନେ ମତପ୍ରକାଶ କରିଥିଲେ। ଏହି ଅବସରରେ କୁଜଙ୍ଗ କଳାକାର ସଂଘର କଣ୍ଠଶିଳ୍ପୀ ତପସ୍ୱିନୀ ମହାନ୍ତି, ଚିନ୍ମୟୀ ବାରିକ ଓ ରୋହିତ ପାତ୍ର ପ୍ରଣବ ପଟ୍ଟନାୟକଙ୍କ ଲୋକପ୍ରିୟ ଗୀତ ପରିବେଷଣ କରି ସଙ୍ଗୀତାଞ୍ଜଳି ଅର୍ପଣ କରିଥିଲେ। କାର୍ଯ୍ୟକ୍ରମରେ କବି ପିତାମ୍ବର ତରାଇ ମୁଖ୍ୟ ଅତିଥି, ଡ. ଗଙ୍ଗାଧର ସାମଲ ଓ ବିଚିତ୍ରାନନ୍ଦ ପ୍ରଧାନ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ରଘୁନାଥ ସାହୁ, ଜିତେନ୍ଦ୍ରିୟ ରାଉତ ଓ ସଞ୍ଜୟ ଓଝା କାର୍ଯ୍ୟକ୍ରମ ପରିଚାଳନା କରିଥିଲେ। ଶେଷରେ ବହୁ ସଂଖ୍ୟକ ସଙ୍ଗୀତପ୍ରେମୀ ଉପସ୍ଥିତ ରହି ସଙ୍ଗୀତାଞ୍ଜଳି କାର୍ଯ୍ୟକ୍ରମକୁ ଉପଭୋଗ କରିଥିଲେ।