ସୁସ୍ଥ ସମାଜ ଗଠନରେ ଫାର୍ମାସିଷ୍ଟଙ୍କ ଭୂମିକା

ଭୁବନେଶ୍ୱର, 24/09/2026, ଉତ୍କଳ voice news - utkalvoicenews.com(ଅଂଶୁମାନ ମିଶ୍ରଙ୍କ ରିପୋର୍ଟ) : ପ୍ରତିବର୍ଷ ସେପ୍ଟେମ୍ବର ୨୫ ତାରିଖରେ ସାରା ବିଶ୍ୱରେ ବିଶ୍ୱ ଫାର୍ମାସିଷ୍ଟ ଦିବସ ପାଳନ କରାଯାଏ। ଉତ୍କୃଷ୍ଟ ସ୍ୱାସ୍ଥ୍ୟସେବା ପ୍ରଦାନରେ ଫାର୍ମାସିଷ୍ଟମାନଙ୍କ ଭୂମିକା, ଅବଦାନ, ଜ୍ଞାନ, ଦକ୍ଷତା ଓ ଦାୟିତ୍ୱକୁ ସମ୍ମାନ ଜଣାଇବା ଏହି ଦିବସ ପାଳନର ମୁଖ୍ୟ ଉଦ୍ଦେଶ୍ୟ। ବିଶ୍ୱ ଫାର୍ମାସିଷ୍ଟ ଦିବସ-୨୦୨୬ର ବାର୍ତ୍ତା ହେଉଛି—‘ସୁସ୍ଥ ଭବିଷ୍ୟତ ପାଇଁ ଫାର୍ମାସିଷ୍ଟମାନଙ୍କୁ ସଶକ୍ତ କରିବା’ (Empowering Pharmacists for Healthier Futures)। ବର୍ତ୍ତମାନ ଓଡ଼ିଶାର ସରକାରୀ ଓ ବେସରକାରୀ ସ୍ୱାସ୍ଥ୍ୟସେବା କ୍ଷେତ୍ରରେ ଫାର୍ମାସିଷ୍ଟମାନେ ନିଷ୍ଠାର ସହ ନିଜ ଦାୟିତ୍ୱ ନିର୍ବାହ କରୁଛନ୍ତି। ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ଔଷଧ ଯୋଗାଣ, ଔଷଧର ସଠିକ୍ ସଂରକ୍ଷଣ, ରୋଗୀଙ୍କୁ ଔଷଧ ସମ୍ପର୍କିତ ପରାମର୍ଶ ଏବଂ ବିଭିନ୍ନ ସ୍ୱାସ୍ଥ୍ୟ ଯୋଜନାର ସଫଳ ରୂପାୟଣରେ ସେମାନଙ୍କ ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଫାର୍ମାସିଷ୍ଟମାନେ କେବଳ ଔଷଧ ବିତରଣ କରୁଥିବା ବ୍ୟକ୍ତି ନୁହନ୍ତି; ସେମାନେ ଔଷଧ ବିଜ୍ଞାନରେ ଶିକ୍ଷିତ ଏବଂ ସ୍ୱାସ୍ଥ୍ୟସେବା ବ୍ୟବସ୍ଥାର ଜଣେ ଦକ୍ଷ ଓ ଅବିଚ୍ଛେଦ୍ୟ ସଦସ୍ୟ। ଔଷଧର ନିରାପଦ ବ୍ୟବହାର, ଯୁକ୍ତିଯୁକ୍ତ ଔଷଧ ପ୍ରୟୋଗ ଏବଂ ରୋଗୀଙ୍କ ଚିକିତ୍ସା ପ୍ରତି ବିଶ୍ୱାସ ବୃଦ୍ଧିରେ ସେମାନଙ୍କ ଭୂମିକା ଉଲ୍ଲେଖନୀୟ। ଫାର୍ମାସିଷ୍ଟମାନଙ୍କ ପାଇଁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବା ସହ ଆଧୁନିକ ଜ୍ଞାନ, ନୂତନ ପ୍ରଯୁକ୍ତି ଓ ନିରନ୍ତର ପ୍ରଶିକ୍ଷଣ ମାଧ୍ୟମରେ ସେମାନଙ୍କୁ ସଶକ୍ତ କରିବା ଆବଶ୍ୟକ। ଏଥିସହ ଫାର୍ମାସିଷ୍ଟମାନଙ୍କ ପେଶାଗତ ମର୍ଯ୍ୟାଦା, ଅଧିକାର ଓ ବୃତ୍ତିଗତ ବିକାଶକୁ ଗୁରୁତ୍ୱ ଦେବା ସହିତ ସ୍ୱାସ୍ଥ୍ୟନୀତି ପ୍ରସ୍ତୁତି ଓ ରୋଗୀକୈନ୍ଦ୍ରିକ ସେବାରେ ସେମାନଙ୍କୁ ଅଧିକ ସୁଯୋଗ ଦେବା ଆବଶ୍ୟକ। ବିଶେଷକରି ଆଦିବାସୀ ଅଧ୍ୟୁଷିତ ଅଞ୍ଚଳ, ପାହାଡ଼ିଆ ଅଞ୍ଚଳ ଓ ଦୁର୍ଗମ ଗ୍ରାମଗୁଡ଼ିକରେ ଫାର୍ମାସିଷ୍ଟମାନେ ସ୍ୱାସ୍ଥ୍ୟ ସଚେତନତାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ହୋଇପାରିଛନ୍ତି। ଔଷଧର ସଠିକ୍ ବ୍ୟବହାର, ଆଣ୍ଟିବାୟୋଟିକ୍‌ର ଅନୁଚିତ ବ୍ୟବହାରର କୁପରିଣାମ, ଔଷଧ ସଂରକ୍ଷଣ ଓ ସେବନର ସଠିକ୍ ପଦ୍ଧତି ସମ୍ପର୍କରେ ସେମାନେ ଜନସାଧାରଣଙ୍କୁ ସଚେତନ କରୁଛନ୍ତି। ସେହିପରି ସ୍ୱାସ୍ଥ୍ୟକର ଜୀବନଶୈଳୀ, ସୁଷମ ଖାଦ୍ୟ, ବ୍ୟାୟାମ, ଧୂମପାନ ବର୍ଜନ ଓ ନିୟମିତ ସ୍ୱାସ୍ଥ୍ୟ ପରୀକ୍ଷା ସମ୍ପର୍କରେ ସଚେତନତା ସୃଷ୍ଟିରେ ମଧ୍ୟ ଫାର୍ମାସିଷ୍ଟମାନଙ୍କ ଭୂମିକା ରହିଛି। ବାତ୍ୟା, ବନ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ଆବଶ୍ୟକୀୟ ଔଷଧ ମହଜୁଦ, ବିତରଣ, ଶୀତଳ ଶୃଙ୍ଖଳା ଆବଶ୍ୟକ ଥିବା ଔଷଧର ସଂରକ୍ଷଣ ଓ ଜରୁରୀ ଔଷଧ ପରିଚାଳନାରେ ମଧ୍ୟ ଫାର୍ମାସିଷ୍ଟମାନେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥାନ୍ତି। ତେବେ ଫାର୍ମାସିଷ୍ଟମାନେ କର୍ମଚାରୀ ଅଭାବଜନିତ ଅଧିକ କାର୍ଯ୍ୟଭାର, ଆଧୁନିକ ପ୍ରଶିକ୍ଷଣର ସୀମିତ ସୁଯୋଗ, ଔଷଧ ପରିଚାଳନା ପାଇଁ ଆବଶ୍ୟକ ଭିତ୍ତିଭୂମିର ଅଭାବ ଓ ଦୁର୍ଗମ ଅଞ୍ଚଳରେ କାର୍ଯ୍ୟ କରିବା ସମୟରେ ଯାତାୟାତ ଭଳି ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଏହି ସମସ୍ୟାର ସମାଧାନ ପାଇଁ ସରକାର, ସ୍ୱାସ୍ଥ୍ୟ ବିଭାଗ ଓ ଫାର୍ମାସିଷ୍ଟ ସଂଗଠନର ସମନ୍ୱିତ ପ୍ରୟାସ ଆବଶ୍ୟକ। ଫାର୍ମାସିଷ୍ଟମାନଙ୍କୁ ଅଧିକ ଦକ୍ଷ, ସଶକ୍ତ ଓ ସମ୍ମାନିତ କରିବା ସ୍ୱାସ୍ଥ୍ୟ ବ୍ୟବସ୍ଥାର ଏକ ପ୍ରମୁଖ ଆବଶ୍ୟକତା। ବିଶ୍ୱ ଫାର୍ମାସିଷ୍ଟ ଦିବସ କେବଳ ଏକ ଉତ୍ସବ ନୁହେଁ, ଫାର୍ମାସିଷ୍ଟମାନଙ୍କ ଦାୟିତ୍ୱ, ଅବଦାନ ଓ ଭବିଷ୍ୟତର ସମ୍ଭାବନାକୁ ସ୍ମରଣ କରିବାର ଏକ ଅବସର। ଫାର୍ମାସିଷ୍ଟଙ୍କ ଉନ୍ନତି ହେଉଛି ସ୍ୱାସ୍ଥ୍ୟସେବାର ଉନ୍ନତି। ଫାର୍ମାସିଷ୍ଟଙ୍କ ସଶକ୍ତିକରଣ ହେଉଛି ସୁସ୍ଥ ସମାଜ ଗଠନ ଦିଗରେ ଏକ ଦୃଢ଼ ପଦକ୍ଷେପ। ଏହି ଅବସରରେ ଦେଶ, ବିଦେଶ ଓ ରାଜ୍ୟର ସମସ୍ତ ଫାର୍ମାସିଷ୍ଟ ଭାଇ ଓ ଭଉଣୀଙ୍କୁ ବିଶ୍ୱ ଫାର୍ମାସିଷ୍ଟ ଦିବସ-୨୦୨୬ର ହାର୍ଦ୍ଦିକ ଶୁଭେଚ୍ଛା ଓ ଶୁଭକାମନା। ଶୁଭଲକ୍ଷ୍ମୀ ସ୍ୱାଇଁ ସଭାପତି, ଓଡ଼ିଶା ଫାର୍ମାସୀ ଅଧିକାରୀ ସେବାସଂଘ, ଭୁବନେଶ୍ୱର, ଓଡ଼ିଶା