ଫେକ୍ ୟୁପିଆଇ ମାମଲା: ୨ ଗିରଫ, କୋର୍ଟଚାଲାଣ

ତିର୍ତ୍ତୋଲ, 02/10/2026, ଉତ୍କଳ voice news - utkalvoicenews.com(ଜିଲ୍ଲା ପ୍ରତିନିଧି ନୃସିଂହ ମଲ୍ଲିକ ଙ୍କ ରିପୋର୍ଟ) : ନକଲି ୟୁପିଆଇ ଆକାଉଣ୍ଟ ଖୋଲି ଲୋକଙ୍କଠାରୁ ଟଙ୍କା ଆଦାୟ ଅଭିଯୋଗକୁ ନେଇ ଜଗତସିଂହପୁର ସାଇବର କ୍ରାଇମ୍‌ ଓ ଇକୋନୋମିକ୍‌ ଅଫେନ୍ସ ଥାନାରେ ମାମଲା ରୁଜୁ ହୋଇଛି। ଚାକିରି କରାଇଦେବା, ପରୀକ୍ଷାରେ ମାର୍କ ବଢ଼ାଇଦେବା ଓ ଚିକିତ୍ସା କରାଇଦେବା ଭଳି ପ୍ରଲୋଭନ ଦେଖାଇ ଟଙ୍କା ଆଦାୟ ହୋଇଥିବା ଅଭିଯୋଗ ରହିଛି। ତଦନ୍ତରେ ରିତେଶ ଜେନାଙ୍କ ପରିଚୟ ବ୍ୟବହାର କରି ୟୁପିଆଇ ଆକାଉଣ୍ଟ ଖୋଲାଯାଇଥିବା ଏବଂ ଏହା ମାଧ୍ୟମରେ ଟଙ୍କା କାରବାର ହୋଇଥିବା ତଥ୍ୟ ମିଳିଥିବା ପୁଲିସ କହିଛି। ମାମଲାର ତଦନ୍ତ ବେଳେ ତିର୍ତ୍ତୋଲ ଥାନା ଅଞ୍ଚଳର ଜଡ଼ତିରା ଗ୍ରାମର ସୌମ୍ୟରଞ୍ଜନ ଓଝା ଓରଫ ବୁବୁଙ୍କ ଭୂମିକା ସାମ୍ନାକୁ ଆସିଥିବା ପୁଲିସ ସୂତ୍ରରୁ ଜଣାପଡ଼ିଛି। ରିତେଶଙ୍କୁ ବ୍ୟବହାର କରି ୟୁପିଆଇ ଆକାଉଣ୍ଟ ଖୋଲିବା ଓ ଟଙ୍କା କାରବାର ଘଟଣାରେ ସୌମ୍ୟରଞ୍ଜନଙ୍କ ସମ୍ପୃକ୍ତି ଥିବା ନେଇ ତଦନ୍ତରେ ତଥ୍ୟ ମିଳିଥିବା ପୁଲିସ ପକ୍ଷରୁ କୁହାଯାଇଛି। ଗତ ୧୮ ସେପ୍ଟେମ୍ବରରେ ଜଗତସିଂହପୁର ସାଇବର କ୍ରାଇମ୍‌ ଓ ଇକୋନୋମିକ୍‌ ଅଫେନ୍ସ ଥାନାରେ କେସ୍‌ ନମ୍ବର ୨୨/୨୦୨୬ରେ ମାମଲା ରୁଜୁ ହୋଇଥିଲା। ମାମଲାରେ ବିଏନ୍‌ଏସ୍‌ର ବିଭିନ୍ନ ଧାରା ସହିତ ସୂଚନା ପ୍ରଯୁକ୍ତି ଆଇନର ଧାରା ୬୬(ସି) ଓ ୬୬(ଡି) ଲାଗୁ ହୋଇଛି। ମାମଲାରେ ସୌମ୍ୟରଞ୍ଜନ ଓଝା ଓ ରିତେଶ ଜେନାଙ୍କୁ ପୁଲିସ କୋର୍ଟଚାଲାଣ କରିଛି। ତେବେ ଅଭିଯୋଗର ଚୂଡ଼ାନ୍ତ ସତ୍ୟତା ଅଦାଲତୀ ପ୍ରକ୍ରିୟାରେ ନିର୍ଦ୍ଧାରିତ ହେବ। ଟଙ୍କା କାରବାରର ପରିମାଣ, ଅନ୍ୟ କାହାର ସମ୍ପୃକ୍ତି ଏବଂ ଏହି ନକଲି ୟୁପିଆଇ ଆକାଉଣ୍ଟ ପଛରେ ଥିବା ସମ୍ପୂର୍ଣ୍ଣ ନେଟୱର୍କ ସମ୍ପର୍କରେ ପୁଲିସ ତଦନ୍ତ ଜାରି ରଖିଛି।