ଜଳିଲା ରାବଣ, ହେଲେ ରହିଗଲା ୬ ମୁଣ୍ଡ; ଚର୍ଚ୍ଚାରେ ପାରାଦ୍ୱୀପ

ପାରାଦ୍ୱୀପ, 21/10/2026, ଉତ୍କଳ voice news - utkalvoicenews.comତାରିଖ: ୨୦/୧୦/୨୦୨୬ : ଅଧର୍ମ ଉପରେ ଧର୍ମର ଏବଂ ଅସତ୍ୟ ଉପରେ ସତ୍ୟର ବିଜୟର ପ୍ରତୀକ ଭାବେ ପ୍ରତିବର୍ଷ ପାଳିତ ହୁଏ ରାବଣପୋଡ଼ି ଉତ୍ସବ। ତେବେ ଚଳିତବର୍ଷ ପାରାଦ୍ୱୀପରେ ରାବଣପୋଡ଼ିକୁ ନେଇ ଏକ ଭିନ୍ନ ଚର୍ଚ୍ଚା ଦେଖିବାକୁ ମିଳିଛି। ରାବଣର ପ୍ରତିକୃତି ଦହନ ପରେ ତାହାର ୬ଟି ମୁଣ୍ଡ ଓ ଚନ୍ଦ୍ରହାସ ଖଡ୍ଗ ରହିଯାଇଥିବା ଘଟଣା ସହରରେ ଆଲୋଚନାର ବିଷୟ ପାଲଟିଛି। ଏହି ଘଟଣାକୁ ନେଇ ବିଭିନ୍ନ ମହଲରେ ବ୍ୟଙ୍ଗାତ୍ମକ ମତ ପ୍ରକାଶ ପାଉଥିବାବେଳେ ଏହାକୁ ସାମାଜିକ ଦୃଷ୍ଟିକୋଣରୁ ମଧ୍ୟ ଦେଖାଯାଉଛି। ରାବଣର ପ୍ରତୀକାତ୍ମକ ପ୍ରତିକୃତି ଦହନ ହେଲେ ମଧ୍ୟ ଅହଂକାର, ଅନ୍ୟାୟ, ହିଂସା ଓ କ୍ଷମତାର ଅପବ୍ୟବହାର ଭଳି ନକାରାତ୍ମକ ପ୍ରବୃତ୍ତି ସମାଜରୁ ସମ୍ପୂର୍ଣ୍ଣ ଦୂର ହୋଇନାହିଁ ବୋଲି ଏହି ଘଟଣାକୁ ନେଇ ଚର୍ଚ୍ଚା ହେଉଛି। ରାବଣପୋଡ଼ି କେବଳ ଏକ ପାରମ୍ପରିକ ଉତ୍ସବ ନୁହେଁ, ବରଂ ନିଜ ଭିତରେ ଥିବା ଅହଂକାର, ଅସତ୍ୟ ଓ ଅନ୍ୟାୟକୁ ପରିତ୍ୟାଗ କରିବାର ଏକ ପ୍ରତୀକାତ୍ମକ ବାର୍ତ୍ତା। ତେଣୁ ରାବଣର କେତୋଟି ମୁଣ୍ଡ ରହିଗଲା, ତାହା ଅପେକ୍ଷା ସମାଜରୁ ରାବଣୀୟ ପ୍ରବୃତ୍ତି କିପରି ଦୂର ହେବ, ତାହା ଅଧିକ ଗୁରୁତ୍ୱପୂର୍ଣ୍ଣ। ପାରାଦ୍ୱୀପର ଶାନ୍ତି, ସୁରକ୍ଷା ଓ ସମୃଦ୍ଧି ବଜାୟ ରଖିବା ସହ ଏକ ସୁସ୍ଥ ସାମାଜିକ ପରିବେଶ ଗଠନ ପାଇଁ ସଚେତନତା, ସହନଶୀଳତା ଓ ଦାୟିତ୍ୱବୋଧର ଆବଶ୍ୟକତା ରହିଛି। ରାବଣପୋଡ଼ିର ପ୍ରକୃତ ବାର୍ତ୍ତା ସେତେବେଳେ ସାର୍ଥକ ହେବ, ଯେତେବେଳେ ମଣିଷ ନିଜ ଭିତରେ ଥିବା ଅସତ୍ ପ୍ରବୃତ୍ତିକୁ ଦୂର କରିବାକୁ ଆଗେଇ ଆସିବ।