ରାୟଗଡ଼ା, 01/11/2026, ଉତ୍କଳ voice news - utkalvoicenews.com( ପ୍ରଫୁଲ୍ଲ କୁମାର ବେହେରା ଙ୍କ ରିପୋର୍ଟ ) :
( ୨୬ ଦିନିଆ ନିଃଶୁଳ୍କ ତାଲିମରେ ପ୍ରାୟ ୫୦ ଜଣ ମହିଳା ହେଲେ ସାମିଲ )

ରାୟଗଡ଼ା-୩୧-୧୦-୨୬ : ଗ୍ରାମାଞ୍ଚଳର ମହିଳାମାନଙ୍କୁ ଆତ୍ମନିର୍ଭର କରିବା ଏବଂ ସେମାନଙ୍କ ପାଇଁ ରୋଜଗାରର ନୂଆ ସୁଯୋଗ ସୃଷ୍ଟି କରିବା ଲକ୍ଷ୍ୟରେ ଇ ଡି ଆଇ ଆଇ ପକ୍ଷରୁ ଆସେଞ୍ଚର ର ସହଯୋଗରେ ୨୬ ଦିନିଆ ନିଃଶୁଳ୍କ ହର୍ବାଲ୍ ଘରୋଇ ଉତ୍ପାଦ ପ୍ରସ୍ତୁତି ତାଲିମ ଆୟୋଜନ କରାଯାଇଛି। ଏହି ତାଲିମ କାର୍ଯ୍ୟକ୍ରମରେ ପ୍ରାୟ ୫୦ ଜଣ ମହିଳା ଅଂଶଗ୍ରହଣ କରି ବିଭିନ୍ନ ପ୍ରକାର ଘରୋଇ ବ୍ୟବହାର ଉପଯୋଗୀ ସାମଗ୍ରୀ ପ୍ରସ୍ତୁତି ସମ୍ପର୍କରେ ତାଲିମ ଗ୍ରହଣ କରିଛନ୍ତି।
ଏହି ତାଲିମରେ ହର୍ବାଲ୍ ସାବୁନ, ହ୍ୟାଣ୍ଡୱାଶ୍, ଫିନାଇଲ୍, ହର୍ବାଲ୍ ସାମ୍ପୁ, ଯନ୍ତ୍ରଣା ଉପଶମ ତେଲ, ଡିସ୍ ୱାଶ୍ ଏବଂ ପିତାମ୍ବରୀ ଆଦି ଉତ୍ପାଦ ପ୍ରସ୍ତୁତି ପ୍ରଣାଳୀ ଶିଖାଯାଉଛି। କେବଳ ତତ୍ତ୍ୱଗତ ଜ୍ଞାନ ନୁହେଁ, ମହିଳାମାନଙ୍କୁ ନିଜେ ଉତ୍ପାଦ ପ୍ରସ୍ତୁତ କରିବାର ବ୍ୟବହାରିକ ଅଭ୍ୟାସ ମଧ୍ୟ କରାଯାଉଛି। ଏହା ସହିତ ଆବଶ୍ୟକ କଞ୍ଚାମାଲ, ଉପାଦାନର ମାତ୍ରା, ଉତ୍ପାଦର ଗୁଣବତ୍ତା, ପ୍ୟାକେଜିଂ ଓ ବଜାରରେ ବିକ୍ରି କରିବା ସମ୍ପର୍କରେ ମଧ୍ୟ ବୁଝାଯାଉଛି।
କାର୍ଯ୍ୟକ୍ରମର ପ୍ରଶିକ୍ଷକ ଶ୍ରୀ ନିହାର ରଞ୍ଜନ ଓଝା ମହିଳାମାନଙ୍କୁ ସମସ୍ତ ଉତ୍ପାଦ ପ୍ରସ୍ତୁତିର ବିଭିନ୍ନ ପ୍ରକ୍ରିୟା ବିଷୟରେ ସହଜ ଭାବରେ ଶିକ୍ଷା ଦେଉଛନ୍ତି। ତାଲିମ ସମୟରେ ମହିଳାମାନେ ଆଗ୍ରହର ସହିତ ଅଂଶଗ୍ରହଣ କରି ନୂଆ ନୂଆ ଉତ୍ପାଦ ପ୍ରସ୍ତୁତି ଶିଖୁଛନ୍ତି।
ଏହି ତାଲିମର ଅନ୍ୟ ଏକ ମୁଖ୍ୟ ଉଦ୍ଦେଶ୍ୟ ହେଉଛି ଓଷାପଡ଼ା ଗ୍ରାମରେ ଉପଲବ୍ଧ ସ୍ଥାନୀୟ ସମ୍ବଳ ଓ କଞ୍ଚାମାଲର ବ୍ୟବହାର କରି ଛୋଟ ଛୋଟ ଉଦ୍ୟୋଗ ଗଢ଼ି ତୋଳିବା। ଏଥିପାଇଁ ଆବଶ୍ୟକ ସମ୍ବଳ ସ୍ଥାନୀୟ ଅଞ୍ଚଳରୁ ଉପଲବ୍ଧ ହେବାର ସୁଯୋଗ ରହିଛି। ଫଳରେ ମହିଳାମାନେ ଅଧିକ ଦୂରକୁ ନଯାଇ ନିଜ ଗ୍ରାମରେ ରହି ଉତ୍ପାଦ ପ୍ରସ୍ତୁତି କାମ ଆରମ୍ଭ କରିପାରିବେ।
ତାଲିମ ଶେଷ ହେବା ପରେ ମହିଳାମାନେ ନିଜ ଘରେ କିମ୍ବା ମହିଳା ସ୍ୱୟଂ ସହାୟକ ଗୋଷ୍ଠୀ ମାଧ୍ୟମରେ ଏହି ଉତ୍ପାଦଗୁଡ଼ିକ ପ୍ରସ୍ତୁତ କରି ବଜାରରେ ବିକ୍ରି କରିବାର ସୁଯୋଗ ପାଇପାରିବେ। ଦୈନନ୍ଦିନ ଜୀବନରେ ସାବୁନ, ହ୍ୟାଣ୍ଡୱାଶ୍, ଫିନାଇଲ୍ ଓ ଡିସ୍ ୱାଶ୍ ଭଳି ସାମଗ୍ରୀର ଆବଶ୍ୟକତା ରହୁଥିବାରୁ ସ୍ଥାନୀୟ ବଜାରରେ ଏହି ଉତ୍ପାଦଗୁଡ଼ିକର ବିକ୍ରି ପାଇଁ ସୁଯୋଗ ସୃଷ୍ଟି ହୋଇପାରିବ। ଏହାଦ୍ୱାରା ସେମାନେ ନିଜ ପରିବାରର ଆୟ ବୃଦ୍ଧି କରିବା ସହ ନିଜ ପରିଚୟ ସୃଷ୍ଟି କରିପାରିବେ।
ଏହି ୨୬ ଦିନିଆ ତାଲିମ କାର୍ଯ୍ୟକ୍ରମକୁ ଶ୍ରୀ ପପୁନ କୁମାର ପ୍ରଧାନ ସୁଚାରୁ ରୂପେ ସମନ୍ୱୟ ଓ ପରିଚାଳନା କରୁଛନ୍ତି। ତାଲିମ କାର୍ଯ୍ୟକ୍ରମର ସମସ୍ତ କାର୍ଯ୍ୟକୁ ଠିକ୍ ଭାବରେ ଆଗେଇ ନେବା ସହ ମହିଳାମାନଙ୍କ ଅଂଶଗ୍ରହଣ ଓ ଶିକ୍ଷଣ ପ୍ରକ୍ରିୟାରେ ସେ ସହଯୋଗ କରୁଛନ୍ତି।
ଈ ଡି ଆଇ ଆଇ ଏବଂ ଆସେଞ୍ଚର୍ ର ଏହି ପ୍ରୟାସ ଗ୍ରାମାଞ୍ଚଳର ମହିଳାମାନଙ୍କୁ ନୂତନ ଦକ୍ଷତା ଶିଖିବା ଓ ନିଜସ୍ୱ ରୋଜଗାରର ମାଧ୍ୟମ ସୃଷ୍ଟି କରିବାରେ ସହାୟକ ହେବ। ଏଭଳି ତାଲିମ ମାଧ୍ୟମରେ ମହିଳାମାନେ ନିଜ ଗ୍ରାମରେ ରହି ଉଦ୍ୟୋଗ ଆରମ୍ଭ କରିବା ସହ ଅନ୍ୟ ମହିଳାମାନଙ୍କ ପାଇଁ ମଧ୍ୟ ରୋଜଗାରର ସୁଯୋଗ ସୃଷ୍ଟି କରିପାରିବେ ବୋଲି ଆଶା କରାଯାଉଛି।