ପାରାଦୀପ, 02/11/2026, ଉତ୍କଳ voice news - utkalvoicenews.com( ପାରାଦୀପରୁ ସୁମିତ୍ରା ସେନାପତିଙ୍କ ରିପୋର୍ଟ ) :
କ୍ରୀଡ଼ା କ୍ଷେତ୍ରରେ ଦୃଷ୍ଟିବାଧିତ ଓ ଭିନ୍ନକ୍ଷମ ଆଥଲେଟ୍ଙ୍କ ପ୍ରତିଭା ଓ ଦକ୍ଷତାକୁ ପ୍ରୋତ୍ସାହିତ କରିବା ଲକ୍ଷ୍ୟରେ ତୃତୀୟ ଓଡ଼ିଶା ରାଜ୍ୟ ବ୍ଲାଇଣ୍ଡ ଓ ପାରା ଜୁଡୋ ଚାମ୍ପିୟନସିପ୍ ୨୦୨୬-୨୦୨୭ ଉଦ୍ଘାଟିତ ହୋଇଛି। ଅକ୍ଟୋବର ୩୧ରୁ ନଭେମ୍ବର ପ୍ରଥମ ସପ୍ତାହ ପର୍ଯ୍ୟନ୍ତ ଚାଲିବାକୁ ଥିବା ଏହି ରାଜ୍ୟସ୍ତରୀୟ ପ୍ରତିଯୋଗିତାରେ ବିଭିନ୍ନ ଜିଲ୍ଲାରୁ ଶତାଧିକ ଦୃଷ୍ଟିବାଧିତ ଓ ପାରା ଜୁଡୋ ଆଥଲେଟ୍ ଅଂଶଗ୍ରହଣ କରୁଛନ୍ତି।
ଏକ ଭବ୍ୟ ଉଦ୍ଘାଟନୀ ଉତ୍ସବରେ କ୍ରୀଡ଼ା ବିଭାଗର ବରିଷ୍ଠ ଅଧିକାରୀ, ଆୟୋଜକ ଓ ବିଭିନ୍ନ କର୍ପୋରେଟ୍ ସଂସ୍ଥାର ପ୍ରତିନିଧିଙ୍କ ଉପସ୍ଥିତିରେ ଚାମ୍ପିୟନସିପ୍ର ଶୁଭାରମ୍ଭ କରାଯାଇଥିଲା। ଏହି ଅବସରରେ ‘ଦୃଷ୍ଟି: ବୀର କଳିଙ୍ଗ’ ନାମକ ଏକ ସ୍ୱତନ୍ତ୍ର ସ୍ମରଣିକା ଅତିଥିମାନଙ୍କ ଦ୍ୱାରା ଉନ୍ମୋଚିତ ହୋଇଥିଲା।
ସ୍ମରଣିକାରେ ଓଡ଼ିଶାର ପାରା-ଆଥଲେଟ୍ମାନଙ୍କ ସଂଘର୍ଷ, ସଫଳତା ଓ ପ୍ରେରଣାଦାୟୀ ଯାତ୍ରାକୁ ସ୍ଥାନ ଦିଆଯାଇଛି।
ଭିନ୍ନକ୍ଷମ ଆଥଲେଟ୍ମାନଙ୍କୁ କ୍ରୀଡ଼ା କ୍ଷେତ୍ରରେ ଆଗକୁ ବଢ଼ାଇବା ପାଇଁ ପାରା ସ୍ପୋର୍ଟସ୍ ଆସୋସିଏସନ୍ ଅଫ୍ ଓଡ଼ିଶା (PSAO) ସହିତ IFFCOର ପାରାଦୀପ ୟୁନିଟ୍, JSW, J.M. Baxi ଓ IndianOil ପରି ପ୍ରମୁଖ ସଂସ୍ଥା ସହଯୋଗର ହାତ ବଢ଼ାଇଛନ୍ତି। ଏହି ସହଯୋଗ ରାଜ୍ୟରେ ପାରା-କ୍ରୀଡ଼ାର ବିକାଶ ଓ କ୍ରୀଡ଼ା ଭିତ୍ତିଭୂମିକୁ ସୁଦୃଢ଼ କରିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି।
ଆୟୋଜକଙ୍କ ସୂଚନା ଅନୁଯାୟୀ, ଏହି ଚାମ୍ପିୟନସିପ୍ରେ ଆଥଲେଟ୍ମାନେ ନିଜର କ୍ରୀଡ଼ା ଦକ୍ଷତା ପ୍ରଦର୍ଶନ କରିବା ସହ ଆଗାମୀ ଜାତୀୟ ଓ ଆନ୍ତର୍ଜାତୀୟ ପାରା-ଜୁଡୋ ପ୍ରତିଯୋଗିତା ପାଇଁ ଶ୍ରେଷ୍ଠ ପ୍ରତିଭା ଚୟନର ସୁଯୋଗ ପାଇବେ। ଏହି ପ୍ରତିଯୋଗିତା ପାରା-କ୍ରୀଡ଼ାବିତ୍ଙ୍କ ମନୋବଳ ବୃଦ୍ଧି ସହ ରାଜ୍ୟରେ ସମାବେଶୀ କ୍ରୀଡ଼ା ସଂସ୍କୃତିକୁ ଆହୁରି ସମୃଦ୍ଧ କରିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।